“Калык кылослэн визыл ошмесъёсыз” конференция “Кылысен йырсазёзь” сериын

2023-тӥ арын 4-6-тӥ коньывуонэ Эстониысь литературая музейын Т.Г.
Владыкина удмурт фольклористлэн 70 арес тырмонэзлы сӥзем “Калык кылослэн визыл ошмесъёсыз” калыккуспо онлайн-конференция ортчоз. Татьяна Григорьевна Владыкина – тодмо удмурт фольклорист, филология тодосъя доктор, профессор, Удмурт Элькунысь тодос удысысь сӥё-дано ужась, Финляндиысь Финн-угор огазеяськонлэн Дано кунгожсьӧр ёзчиез, Удмурт Элькун Кивалтэтлэн калык лулчеберет удысысь «Душа Удмуртии» премилэн лауреатэз (2023), УдмФИЦ УрО РАН-лэн Историяя, кылъя но литературая удмурт институтысьтыз филологи эскеронъёсъя ёзэтысь валтӥсь тодосчи. 1975-тӥ арын йылпумъяз Удмурт кун университетэз, 1975-1978-тӥ аръёсы дышетскиз Тарту университетлэн аспирантураяз. 1972-тӥ арысен люка-бича, эскере но печатла удмурт фольклорез, 1978-тӥ арысен фольклоръя но этнографияя экспедициос радъя, «Удмуртский фольклор», «Памятники культуры», «Фольклорное наследие», «Удмуртская обрядовая азбука» книга сузьетъёсты лэсьтонэн но печатланэн кивалтэ. Солэн ужъёсыз удмурт фольклорез, мифологиез но калык лулчеберетэз эскерон удысын но оглом финн-угор фольклористикаын бадӟым но шӧдскымон инты басьто.

Докладъёссэс лыдӟозы Эстониысь, Венгриысь, Финляндиысь, Франциысь, Удмуртиысь, Башкортостанысь, Марий-Элысь, Карелиысь, Комиысь тодмо финно-угроведъёс но егит тодосчиос. Конференциын эскеремын луозы фольклорез люкан-бичан ужен, калык лулчеберетлэн туала улонэныз но мифологиен герӟаськем юанъёс.

Конференция радъяськоз Microsoft Teams площадкаын.

Онлайн амалэн KirmusTV пыр учкыны луоз.

Конференциез радъясьёс – Эстониысь литературая музейысь фольклористикая ёзэт но Россиысь тодосъя академилэн Урал ёзэтысьтыз Эскеронъёсъя удмурт федерал центрысь Историяя, кылъя но литературая удмурт институт но Удмурт кун университет. Конференция ортче Музей, Институт но Университет куспын ӵош ужан сярысь огкыл кутэмен валче но “Keelest meeleni” – “Кылысен йырсазёзь” конференция серияын, кудӥз сӥземын сӥё-дано фольклористъёслы. Конференция дыръя Татьяна Григорьевналэн тодослыко ужъёсыныз адӟытон ужалоз. Соин тодматскыны луоз Эстониысь литературая музейлэн 1-тӥ этажаз.